Simple дэх найзууд нь та нартаа зориулан энэ долоо хоногоос эхлэн Business Blog булангаар дамжуулан бизнесийн салбарт үйл ажиллагаа, байгууллагын соёл зэрэг олон талаараа шинэлэг, үлгэр жишээ байж чадсан компаниудын түүх, түүний дотроос хүний нөөц, санхүү, маркетинг, хөрөнгө оруулалтын чиглэлд шинэ санаа болохуйц ухаалаг, сонирхолтой шийдлүүдийг нь өлгөн авч, тайлбарлан хүргэх болно.
Business Blog-той хамт байх шалтгаан
Хэрвээ чи жижиг дунд бизнес эрхлэгч бол чамд тулгарч буй хүндрэл бэрхшээлүүдийг даван туулах арга замыг хаа нэгтээ, хэн нэгэн олсон л байж таараа. Түүнийг л бид хүргэхийг зорино доо 😉
Business Blog ямар дүрэмтэй вэ?
Дүрэм 1: Нуршихгүй, уйдаахгүй, цаг үрэхгүй.
Дүрэм 2: Товч, тодорхой, хэрэгцээтэй.
Дээрх дүрмүүдийг дагахын тулд Business Blog-оо бид “1-2-3-4” форматаар хүргэх болно. Тодруулбал:
1 - Компанийн түүхийг нэг л цогцолбор мэдээлэл
2 – Тэдэнд тохиосон хоёр том сорилтыг
3 – Асуудлаа шийдсэн гурван гол аргыг
4 - Ойлгож авах дөрвөн онцлох зөвлөмж
Эдгээрээс Business Blog маань бүтнэ гэсэн үг. Ингээд Business Blog-ийн эхний дугаарт тавтай морил. Эхний дугаарын гол дүр Zappos. Гол сэдэв нь хүний нөөц.
1 цогцолбор мэдээлэл: Уулга алдам үйлчилгээг бүтээсэн 26 жил
1999 онд байгуулагдсан эл компани нь өдгөө онлайн худалдаа тэр дундаа гутал, бэлэн хувцасны салбар дахь томоохон тоглогчдын нэг болжээ. Анхандаа бол дан гутал зардаг байж байгаад явцдаа хэрэглэгчдэдээ зориулан бэлэн хувцас, ганц нэг өөр төрлийн бүтээгдэхүүн нэмсэн. Та хэдийн маань зарим нь сонсоогүй байж магад. Аргагүй ээ, Амазоны захирал Жефф Безос ах “Би ч бас олон компани үзсэн дээ, Заппос шиг байгууллагын соёлтой компанийг бол анх удаа л харж байна” гээд л байгууллагын соёлд нь гайхашраад, зарим талаараа атаархаад 1.2 тэрбум ам.доллараар “Менежментийн асуудалд нь орохгүй ээ” гэдэг тохироогоор 2010 онд компанидаа нэгтгэсэн байдаг. Өдгөө 15 дахь жилдээ Амазоны доор үйл ажиллагаа явуулж байгаа гэсэн үг. Ер нь Заппосын бий болгосон байгууллагын соёлыг ганц Жефф Безос ч биш, дэлхийн олон захирал, энтрепренерүүд сонирхдог юм билээ. Яагаад гэдгийг мэдээж дор тайлбарлана аа. Гол ялгарал нь их амархан. Ерөөсөө л хэрэглэгчдийг уулга алдтал нь үйлчлэх явдал ба үйлчлүүлэгчдээ сэтгэл ханамжтай болгохын тулд боломжит бүх л хувилбарыг турших байгууллагын соёлтой.
2 том сорилт: Хонгилын үзүүр дэх гэрлийг хайх нь
Хэзээ цалин авах юм бээ?
Гутлыг онлайнаар зарах нь 1999 оны үед бол галзуу, боломжгүй мэт зүйл байсан ч тэд энэ санаандаа хэчнээн итгэлтэй байсныг 2007 он хүртэл ашиггүй ажилласан ч үргэлжлүүлсээр байснаас нь харж болно. Өөрөөр хэлбэл тэд 8 жилийн хугацаанд цэвэр орлогогүй ажилласан гүргэр бас зөрүүд компани.
Биечлэн өмсөж байж л хөлийн хэв, размер, загварын мэдрэмждээ тохирсон гутал авах боломжтой хэмээн итгэдэг байсан үед тэд “Гутлыг онлайнаар авах боломжтой, тэгээд ч болоогүй худалдан авалт бүр тань амжилттай, хүлээлтэд нийцсэн байж болно” гэдгийг харуулахын тулд барааны агуулах, дуудлагын төвийг шинэчлэх, ашигтай байрлалд нүүлгэхээс эхлээд олон эрсдэлтэй шийдвэр гаргаж, тэр бүрдээ өндөр дүнтэй хөрөнгө оруулалтыг хийж байв. Үүнийг хийхийн тулд хамтран үүсгэн байгуулагч, тухайн үеийн гүйцэтгэх захирал агсан Тони Шиэ нь цалингаа 24 ам.доллар хүртэл бууруулж бүсээ чангалж байсан гэдэг.
Ийм олон бүтэлгүй худалдан авалтуудыг яах юм бэ?
Дээр хэлсэнчлэн гутал бол онлайнаар зарахад тун төвөгтэй бизнес. Хүн бүрийн хөлийн хэв өөр, гутал бүрийн өмсгөл өөр, хэрэглэгч бүрийн төсөөлөл өөр. Бүтэлгүй худалдан авалтууд буюу буцаах хүсэлт 50 хувьд хүрч, хоёр хэрэглэгч тутмын нэг нь авсан бүтээгдэхүүнээ голж байв. Энэ бүр үргүй зардал болж байлаа.
3 гол арга: Боломжгүйгээс бодитыг бүтээх нь
Сонс, сонс бас дахин сонс
Заппосын бүх цаг үеийн гол дүрэм нь “Deliver WOW Through Service” буюу хэрэглэгчдийг уулга алдахад хүргэхүйц тулчихсан, тасарчихсан, мултарчихсан үйлчилгээ үзүүлэх л явдал. Онлайнаар гутал зарах угаас амаргүй бизнес. Үйлчилгээ хэчнээн төгсөрсөн ч хүн бүрийн хөлийн хэлбэр өөр байх нь хэвээрээ болохоор ямар нэг алдаа, буцаах хүсэлт ар араасаа ирж л таарна. Гол нь тэр бүхнийг найрсгаар хүлээн авч тултал үйлчлэх нь л Заппост чухал байлаа.
Үүний тулд тэд 24/7 дуудлагын төв ажиллуулж, хэрэглэгчдийн бүх л санаа гомдлыг найрсгаар сонсож, авсан бүтээгдэхүүнээ 100 хувь буцаахыг зөвшөөрч, хэчнээн урт ч байсан төвөгшөөлгүй ярихыг сонгосон. Бүр цаашлаад хэрэглэгч л сэтгэл ханамжтай байвал гээд өөрсдөд нь төгс хувилбар байхгүй бол өрсөлдөгч компаниудынхаа сайт руу ороод гутал санал болгодог гээд л бод. Ингэснээр өөрсдийнхөө агуулахад байгаа бүтээгдэхүүнээ зарж чадахгүй ч гэлээ үйлчлүүлэгчтэй урт хугацааны холбоо тогтоож, итгэлийг нь хүлээж, гутал гэхээр л Заппосыг боддог болгож чадсан гэдэг. Мундаг байгаа биз? 
Ер нь ингээд бодохоор Заппос анхнаасаа энэ бизнесээ жирийн нэг гутлын дэлгүүр, наймаа хийгээд хурдан ашгаа хүртэх ажил гэж бодоогүй нь илт байгаа юм. Тэд энэ салбарт инновац хийнэ, үүний тулд тодорхой хугацаанд хэрэглэгчээ бэлтгэж, зах зээлээ төлөвшүүлнэ, тэгж байж л сая нэг орлоготой золгоно гэдгээ л сайтар ойлгочихсон байсных. Үгүй ээ одоо тэгээд ийм хэмжээний бодол байгаагүй бол ямар л тэнэг нөхөд 8 жил цэвэр ашиггүй ажиллах вэ дээ, тийм ээ? Угаасаа ч анх байгуулагдахдаа л Customer experience буюу хэрэглэгчийн туршлагаар хамгийн шилдэг нь байна гэж л гарч ирсэн юм билээ л дээ.
Анхнаасаа л зөв хүнд цагаа зарцуул
Ийм нарийн үйлчилгээ үзүүлэхийн тулд ажилтнуудаа энэ хэмжээнд сургах нь чухал. Энэ хэмжээнд сургахын тулд тэр хэмжээний ажилдаа дуртай, компанийн нэг хэсэг байхыг хүсдэг хүн байх хэрэгтэй гэсэн үг. Ээ дээ, энэ л яг Заппосын амжилтын үндэс нь юм билээ. Шуудхандаа, хүний нөөцийн бодлого нь тэднийг энэ амжилтад хүргэсэн гэхэд болно. Бод доо, ажил горилогч бүрийг хувь хүнийх нь хувьд хүндэлж байгаагаа хувьчилж и-мэйл бичиж, ажилд орохтой холбоотой асуулт, тодорхойгүй зүйл байгаа эсэхийг нь асууж илэрхийлнэ. Ажлын ярилцлагад ороход нь аль болох дарамт өгөлгүй, хөгжилтэй мөртлөө бүтээлч асуултуудыг асууна.
Хайдаг хүмүүс нь их тодорхой. Нэгт, хандлага сайтай, хоёрт, шаргуу хөдөлмөрлөдөг, гуравт, хошин мэдрэмжтэй, шооч, инээх дуртай марзан хүмүүс гэж байгаа.
Ингээд ажлын ярилцлагад тэнцсэн тохиолдолд сар гаруйн дадлагажуулах хөтөлбөрт хамруулна. Үүнд дуудлагын төв, агуулах гээд компанийн үйл ажиллагааг ойлгоход туслах төрөл бүрийн ажлууд багтана. Ингээд сарын дараа хоёр талаас үргэлжлүүлж ажиллах, ажиллуулах эсэхээ шийддэг. Хэрвээ өөрийгөө “энэ компанид тохирохгүй нь ээ” гэдгээ хүлээн зөвшөөрөөд, оройтоогүй байгаа дээрээ шударгаар болихыг хүсвэл түүнийг нь үнэлж 2000 ам.доллар урамшуулалд өгдөг гэсэн. Ёохх, тийм гоё байхдаа яах вэ дээ? Атаархаж үхэх нь ээ. Ерөөсөө гол зорилго нь анхнаасаа л зөв хүмүүсийг ажилд авч, зөв хүмүүсийг баг болгож, зөв хүмүүст цаг мөнгөө зарцуулах бодлого ард нь байгаа юм.
Нарыг хайрла, ажилтнуудаа ч бас хайрла
Дээрх шалгуурыг давж орж ирсэн ажилтнууд үйлчлүүлэгчдэдээ яаж, ямар сэтгэлээр үйлчлэх нь тодорхой биз дээ. Ингэж шалгарч орж ирсэн ажилтнууд нь бизнес, менежментийн сууриас эхлээд ахисан түвшний сургалтад үнэ төлбөргүй сууж, мэргэжилтний хувьд тасралтгүй хөгжхөөс гадна ажил дээрээ төрөл бүрийн үдэшлэг хийж, удирдлагуудтайгаа нэг түвшинд харилцаж, ажил дээрээ караокедож, эрүүл мэндийн бүх л үйлчилгээг үнэ төлбөргүй авч, ёстой л жаргаж ажилладаг юм байх аа. Даргад загинуулна, ингээд хийчихвэл тэгээд буруудчихдаг юм болов уу гэдэг айдасгүй, задгай уур амьсгалтайгаараа алдартай.
Үүнийхээ хариуд ерөөсөө л хэрэглэгчдээ жаргаах үүрэгтэй. Тиймдээ ч хэрэглэгч бүртэй ойр дотно байж, хүссэн бүхнийг нь өгөхдөө анхаардаг байна. Дүрэм нь “сэтгэлийг нь хөдөлгөж, амьд харилцаа үүсгэж, шууд ярилц”. Тэгээд л болоо. Ингэснээр тэд маркетингийнхаа зардлыг хэмнэчихдэг гэнэ. Учир нь хамгийн сайн маркетингийг нь аман буюу хэрэглэгчдийн сэтгэгдэл гэж үздэг. Сэтгэл хангалуун хэрэглэгчид дараагийн хүнд туршлагаа дамжуулах нь цаг хугацааны л асуудал аж.
4 онцлох зөвлөгөө: Хэрэглэгчдийг алмайруул
- Заппосын 10 үнэт зүйл:
● Хэрэглэгчдэдээ уулга алдам үйлчилгээ үзүүл
● Өөрчлөлтийг эергээр хүлээн авч, удирд
● Хөгжилтэй бас бага зэрэг этгээд байхад болно
● Адал явдалд дуртай, бүтээлч, нээлттэй сэтгэлгээтай байх чухал
● Сурч, өсөхийг эрмэлз
● Нээлттэй, шударга харилцааг бий болго
● Эерэг сэтгэлгээтэй, гэр бүлсэг сэтгэлгээтэй багийг бүрдүүл
● Бага зардлаар ихийг хий
● Хүсэл эрмэлзэлтэй, шийдэмгий бай
● Даруу бай
“Нэн түрүүнд алсын хараагаа тодорхойл. Тэгж байж л мөнгө араас нь дагалдана.” – Тони Шиэ, Заппосын Гүйцэтгэх захирал асан
“Хувь хүний ирээдүйг зан байдал нь тодорхойлдог бол байгууллагын ирээдүйг соёл нь тодорхойлдог.” Тони Шиэ, Заппосын Гүйцэтгэх захирал асан
“Сайн бизнес бол хүсэл тэмүүлэл, ашиг орлого, зорилгын огтлол юм.” Тони Шиэ, Заппосын Гүйцэтгэх захирал асан Зиа нэг ийм сонирхолтой компани байна. Хэрэгтэй зүйл байсан гэж найдаж байна. Байгаагүй бол эсвэл өөр зүйл хүсэж байвал бидэнд хэлээрэй. Өлгөж аваад л биелүүлэхийг хичээх болно.
Зиа нэг ийм сонирхолтой компани байна. Хэрэгтэй зүйл байсан гэж найдаж байна. Байгаагүй бол эсвэл өөр зүйл хүсэж байвал бидэнд хэлээрэй. Өлгөж аваад л биелүүлэхийг хичээх болно.
(Нээрээ, Simple хайртай бизнесүүдээ дэмжиж нэг тэрбум төгрөг хүртэлх бизнесийн зээлийн үйлчилгээ үзүүлж байна. Энд дарж байгаа газраасаа онлайнаар эрхээ шалгаарай)
